Paneeraq Siegstad Munks prædiken påskedag

Poorskip iivangkiiliuani oqaluttuarineqarpoq annaassisunnguaq toqunerata kingorna ilivermut ilineqarsimasoq, ilerfiarneqartoq, ullullu pingajussaanni poorskip ullaavani makissimasoq tusarparput.

Angutip inuusuttup qaqortunik atisallip arnat pingasut ilerfiartut oqarfigai: “Annilaaqinasi! Jiisusi Nazaretimioq sanningasulimmut kikiattorneqarsimasoq ujarparsi. Makissimavoq, maaniinngilaq. Takuuk, aajuna ilineqarfia!”

Toqukkut qimagaasimasugut annaasaqarnitsinni misigissuseq sungiusimanngisarput, asasatta toqukkut qimaguttup soorlu tammartutut annaanera oqaasertaleruminaatsittarparput. Timi anernerup qimassimasaa ilisarnaraluartoq amigaateqartarpoq, eqitsisarneranik -  toqusimasulluunniit pissusii, timi takunerani misigitinneqartaraluartut isaasalerlugu tammartutut ittarput.

Soorlu Jiisusip nammineq oqaasii malillugit Tallimanngorneq tannaartumi misigissuseq annaasaqartumut takkuttarpoq: Guutiga guutiga sooq qimappinga?

Taassaanngitsumik aliasunneq qimagaasutut misigineq, maqaasineq oqaasertalerneqarpiarsinnaanngitsoq aqqusaartarparput. Misigissutsimi tassaniissimassapput taakku arnat pingasut ilerfiarlutik ornigukkamik aqqusaagaasa ilaat.

Jiisusip sanningasulimmi kikiattugaalluni ilumut inuinnartut misigissutsit aamma pigisimagai oqaasiitigut timitarsivarput. Iluitsumik inuugami iluitsumillu guutiulluni. Taamaakkami oqartarpugut inuttut suulluunniit misigissutsit aqqusaakkagut Jiisusip nammineq aqqutigisimammagit suulluunniit pillugit attavigiuarsinnaagipput, qinnutigullu tusarneqartartut. 

Toqukkut qimagaasimalluni aliasunnerup suna tamaat sunnertarpaa, nerisassat mamassusaat, sinik iluamik soorlu naammatsinnarani, inuunermut perusussuseq allaat kimeerukkallarsinnaasarpoq.

Ullumili oqaluttuarineqarpoq poorskip ullaarsuani imaannaanngitsumik pisoqartoq. Angutip inuusuttup qaqortunik atisallip arnat ilerfiartut oqarfigimmagit, Jiisusi kristusi tamaaniinngilaq makissimavoq.

Poorskip ullaavani uppernarsineqarpoq ilumut Jiisusi Kristusi tamaaniikkunnaarsimasoq, toqusuniik makissimasoq. Tamannaluuna qitiusoq upperisatsinni, tassa Guutip ajugaqanngitsuugami - sapigaqanngitsuugami toqu taarlu ajugaaffigalugit makinnissarput aqqutissiuukkaa. Jiisusi tamaaniikkunnaarmat Guutip kisimiilersinngilaatigut, maannami peqataavoq Anersaakkut Illernartukkut.

Tamannami aamma meerannguulluta kuisinnitsinni aqqutissiuunneqarpoq, kuissutikkummi annoraaq qaqortoq nutaaq atisarparput, kristumiut puuat. Tupitut ittoq, anaanap illiaasut ini eqqissinartoq - qasuerfissamik iserfigalugu angerlarfiujuaannarsinnaasoq. Sumorsuaq angalaqqaarata, silarsuami ujaasiusaaqqaarata ininnguaq matuinnarlugu Naalagaq isertortumiittoq ornittuaannarsinnaasarput.

Inuunerup aqqutaani tupeq, soorlu aasami piffinnut alianaatsunut angalallugu toqqissinarisangarput upernassalermat erinigisalerparput angallatilaarnissaa.

Taamaapportaaq Kristumiusut inuunermi tupeq eqqissinartoq atisimasarput, inuunerup assigiinngitsunik aqqusaartitaani peqatigiuagarput. Tassa taanna sanningasoq kiinnakkullu sakissakkullu uatsinnut ikkunneqarsimasoq ilisarnaataavoq. Anisarnitsinni isertarnitsinnilu paarsiuartoq.

Poorskip oqariartuutigaa nunarsuarmi inuunerput eqqissinanngitsorpassuaqaraluartoq, ersissanngitsugut. Guutip asanninnera ersinermik ilaqanngilaq, ersisorlu asanninnermik naammatsissimanngilaq.

Tamakku tamaasa pillugit Jiisusi Kristusip toqusunit makinnera, uagutsinnut uppertunut kimeqalerpoq. Tupermi qanorluunniit atugaqaraluarutta neriuutissaqalerfik. Asanninnermillu naammatsissimanngikkutta Jiisusi Kristusi aqqutaavoq eqqissinermut. Tassa taanna oqaluussissutigisarput, upperisattalu qiterisaa. 

Sisamanngortoq illernartumi unnukkut pisimasoq, Jiisusip tigusaagami misigisapilui silarsuatsinni takujuarpagut suli. Miserratigineqarsinnaanngilaq inoqatigiit akornatsinni suli soqqusaatsuliortoqartarmat. Nunani allani kisimi taamaanngilaq, nunatsinni aamma oqaatsitigut, socialmediatigut, timimik annersaanikkut pissusilunnikkulluunniit inoqartarpoq ersisitsiniaasunik. 

Soqqusaanneq soorlu naammanngitsoq, qaavatigut uppertuusugut nikassarneqartarpugut, illaatigineqarlutalu nunami allamiunut maleruutiinnarnerarluta. Tamannali eqqunngilaq, ullumikkut najoqqutarisaq tusarnaarluariarsiuk. Oqaanneqaratta inuuneq minguitsoq piviusorlu pillugit inooqqulluta. 

Upperisap politikkillu akulerussuunneqarlutik tunngavigalugit nunamik aqutsineq mianernartortaqarmat taamaaliorusunngilagut. Namminerlu ataqqineqarnissarput pinnagu, Guutilli ataqqinaatissaanut palasiusugut kiffaangatta. 

Qanga pisimasuniigata, ingutsisaqattaarata, annersaanata, ersisitsinata, suleqatigut mamarlernagit, sapiissuseerunnatalu perusuppugut.

Tamakkuukua kristumiuussutsimi ungangilluinnarigut, akuersaanngilagut naalliutsitsinerit, akuersaanngilagut ersisitsinerit, akuersaanngilagut soqqusaatsuliornerit. Qinnuppagulli taamaaliortut nammineq eqqississutissartik nanissagaat. Taamaaliortarunnaarnissamut ikiortittoqarsinnaavoq. 

Kalaaleq sapilersitaasimanngilaq tamanna uteqattaaraluarpassulluunniit upperilernavianngilara, avatangiisimini peqqarniissinnaasartumi inukulunnguulluni killissaqarnini misigisaqigamiuk maniguulluni inuuvoq. Sungiusartuarpoq anorersuit takkuppata isumatusaarnikkut oqquiffissaqarumagami.

Inuiaqatigiinnilu aaqqissuussaasimanitsinnik nikassaaniaannarani ullaat tamaasa makittaraaq, sapinngisannguaminillu inuiaqatiminik kiffartuussisarpoq. Guutip saammaanneq uagutsinnut atugassarititaa naapertorlugu. 

Upperisarput pillugu, nikallunngilagut toqqissiffigigatsigu. Oqaluussissutigineqartoq siulitta nammineq toqqagaat, kiffaanngissuseqarlutalu upperiumasarput  pilluaqussut kimittooq, asanninneq angingaartoq Guutip uagutsinnut tunniussaa - inuuneq. Nammineq anersaartorsinnaajunnaarutta angerlarfissarput Guuti, Guutip inaani tamatta katersorneqarumaaratta erinigisarput. 

Ungangisarigatsigu oqaluttuat Guutip imminiiginnarsimanngikkaatigut, ullaallu tamaasa pilluaqqutinik periarfissanillu nutaanik tunisarmatigut. Peqatigiuaannarmatigullu allaat kiserliornitsinni. 

Taamaammat nunatsinni assigiinngisitaarneq ammip qalipaataa pineqarpat, kinguaassiutitigut soqutigisat pineqarpata, upperisarsiortullu ilai tupinnarluinnartaraluartut ilagiittut upperaarput tamatta inissaqartitaasugut – oqaloqatigiinnerlu eqqissinermik anguniagalik, neriuummik timitaliisoq illersortuassavarput inuunitsinilu toqqammavigalugu. Neriuppunga nunatta siunissaani tamanna suli pingaartinneqarluni attatiinnassagipput. AMEN